للأسف مرسى ضيع فرص كثير
بعد اقالة طنطاوى وعنان والشعب كله مؤيدين ومعارضه ساعتها مكانش حد رافض ولا حد اتكلم الا قليل من لاحسى البيادة
كانت فرصة مرسى كمان بعدها بأيام تنظيف الداخلية بقرارات جريئة باحالة كثير من الرؤوس الكبيرة فيها الى التقاعد وتنظيف هذا الجهاز العفن وهم كانوا فى انهيارهم الكلى وقتها
كانت فرصة مرسى فى اقالة المحافظين اللى متعاونوش معاه فى برنامج ال 100 يوم بالسيطرة على العمال وموظفين البلديات والتموين فى القضاء على مشكلة النظافة ومشكلة رغيف العيش وتعميم تجربة فصل البيع عن الانتاج اللى بدأت فى 2010 وحققت نجاح باهر فى المحافظات او المراكز اللى طبقتها لاحساس المواطن بالتغيير السريع
كانت فرصة مرسى فى وضع حجر الاساس لعدة مشروعات كبيرة حتى لو لم يكن التمويل جاهز لها وقتها واشتغل على ان العمل فيها هيبدأ مع السنة المالية الجديدة
كانت فرصة مرسى فى تقسيم اراضى للسكن فى المناطق الصحراوية وبيعها للمواطنين وخصوصا الشباب بالتقسيط فى كل المحافظات اللى لها ظهير صحراوى مع وعده بتوفير الخدمات (مياة – كهرباء – هواتف – رصف شوارع – صرف صحى ) لها فى الثلاث سنوات القادمة على مراحل
كانت فرصة مرسى انه يجنب ولو مليار واحد او اثنين من المليارات اللى اتصرفت لاعطاء قروض بدون فوائد للشباب لاقامة مشروعات صغيرة ومتوسطه حتى 50 الف جنيه ويساعدهم بعدة قرارات على شكل قوانين بتسهيل اجراءات اقامة هذه المشاريع (40 الف شاب ب 40 الف مشروع صغير بقروض هيستعيدها على مدار 5 سنوات واقراضها لـ 40 الف شاب اخرين )
كانت فرصة مرسى بمصارحة الشعب باحجام وارقام الفساد اللى بيظهر امامه ومين وراه وميسيبش الشعب يضرب اخماس فى اسداس كده وجماعته ومواليه يتفرغوا للاشاعات والتبرير والكلام الفاضى ويستغلهم حتى فى الانتاج كل فى موقعه بدل ماكرهوا الناس فيه وفى اللى جاى من ريحته
كانت فرصة مرسى ان يستغل الشحنه المعنوية اللى كانت عند الشعب كله مؤيدين ومعارضه (ماعدا الفلول وبتوع شفيق) اللى كانو موجودين فى ميدان التحرير وراح لهم وفتح صدره
كانت فرصة انه يركز على القطاع الصحى برفع رواتب الاطباء والعاملين فى المستشفيات الحكومية ويحط لهم ضوابط للعمل والانتاج للتفرقة العادلة بين العاملين فى المستشفيات الحكوميه بجد واللى واخدينها تضييع وقت وساعات دوام وخلاص
كانت فرصه انه يخلى الجيش يحل محل الشرطه فى اى مكان فيه تقصير امنى من الشرطه ويقعد يراقب ويتدخل بمشرط جراح
ضيع فرص كثير ثانية
واتجه للعداء مع القضاء والاعلام والمعارضة واستحلى الاعلانات الدستورية والكلام عن القرض الدولى كأننا هنموت لو مجاش القرض ده وركز اوى فى البرلمان وعودة البرلمان بأى شكل ولما مقدرش يرجعه قعد يفكر ازاى يجيب برلمان جديد والكل يقول له ياعم مرسى الاقتصاد وهو وجماعته يقولوا البرلمان ياعم المشاكل الحياتية للمواطنين وهم مفيش على لسانهم الا البرلمان ياعم هنجيب لك بونبونى وهم يقولوا البرلمااااااااااااااان .... اين البرلمااااااااان